گۆڕا خسرۆی

گۆڕا خسرۆی

کۆمەلەک ل بیرەوەریێن گۆڕا خسرۆی. ل سالا ١٩٧٤ بو، ڕۆژەکێ ئەز و باپیرو بابێ  خۆ  ل هنداو زەویا چالۆکا بوین و چلوین ت بڕی و ت نژنی. دەما بێندانێ بو و ئاگرەکین هەلکردبو، سێ پێکوچکین دانابون و پوش و پەلاخین ل دەورەی خاوین کردبوۆ دا ئاگر بەرنەبیتە پوش و قەزەپ و دارا، کتریەکە پان و پوچ و تەنی گرتیین تەژی ئاو کردبو و ل سەر پێکوچکاین دانابو نێزیک بو کتری بکەلی و چایێ حازر بکەین، وەختەکی دیتین دو ڕێبوار ل گۆندێ شۆشنێ شۆڕ بونۆ ڕک و ڕک پ کەرخە ڕێدا بەرەو گۆڕا خسرۆی. دیارە ئەو هەردو کەس جەلەبکڕ بون و تیانویست بەرەو گوندێ مە بێن. ئەمەش چاو لێبو دابزانین کا دێ هەر هەتا گۆڕا خسرۆی هێن یان دێ هێنە ڕوبارو پەڕنۆ بەرەو لایێ مە. گۆڕا خسرۆی ل هەردو لایا شیو بو، هەردو شیوش یەپڕ بون ل دارێ بەرگر، وەکی هرمی و کرۆسک و گیوشک و ترێ زەرکۆک و بێسیرکە و هنارو بەلالوک و دار بەڕو و دار مازین و ستری کەناری و هەتا دوایێ. پ تایبەت شیوا دەستێ ڕاستێی گۆڕێ تەژی بو ل دار سماقا، گەلەک پاییزا شۆشنەیی تهاتنێ پ بارێن هێسترا سماقیان لێ ت چنی. هەر وەتۆ بیشی و چڕە دارەکی لێکدایی بو مرۆ نەتشیا پێش خۆ ببینی، دابێی تایبەت مالا هرسایە، ڕەنگە ل هەر سەد مترا دو سێ لانێت هرسا ت ناو ئەو بیشەلانادا هەبون. ئەو هەردو ڕێبوار هاتن هاتن هەتا گەشتنە ناو پەرچا دەو ئاوێ، هرسەک ل ناو پەرچێ دەرپەڕی و بۆڕاندی و ل بەر ڕێبوارا حەلات بۆ لایێ دەو ڕوباری، هەردو ڕێبوارش پشت و پشت ل بەر هرسێ حەلاتن بۆ لایێ شۆشنێ و ل ترسا تگە حەلاتنێ دەبانجەیان هەوایی و بێ ستێرە ت تەقاندن، هندی بابێ من گاس کردێ و گۆتیێ نەحەلێن، هرس چۆ و ناهێتە هنگۆ، ڕێبوارا وەتۆ ترس لێ غالب ببو، هاگایان ل کەس نەبو. بەردەوام بون ل حەلاتنێ هەتا سەرێدیی گۆڕێ. هنگیا هاوڕیان داوۆ و هرس دیار نەبو، بێنەکە خۆش ڕونشتن و زانییان هرس نەمایە، ئەو وەختی پ ترسە ترس هاتن ل گۆڕێ تێپەڕین و هاتنە سەر ڕوبار و دەرباز بون بۆ لایێ مە. ئەمەش چا بۆ وان هێلابو، هاتن و پاش سەلام و گفتوگۆ، بابێ من کیسکێ توتنا فەل و پەڕ دانۆ وان دا جغارێ بپێچن، هند ترسیابون، ئەوێ کیسک وەرگرتی دەستی وەتۆ تلەرزین، هەر چەندی توتنی ل سەر پەڕە جغارەی ڕو ت کرد، ل بەر لەرزینێ توتن ت ڕژیا. بابێ من توتن و پەڕ لێوەرگرتن و جغارەی بۆ پێچان. چغارەیان کێشان و نان و ماست و چایان خواردن، خاتریان خواست و بەرەو گوندێ بەنێ وڕێکەتن. مەش چلو نژنین تەواو کردو گەڕیاینۆ بۆ مال. ئەمە ل وێ ژیابوین و ل هرس و بەراز و گۆرگا ڕاهاتبوین و ترسین لێ شکابو. بەس بۆ کەسێن نەشارەزا، جیەکی پ سەهم و ساف بو.

جارەکێ کەریم مهاجیر شۆشنەیی هاتبووە شیوا تەنشت گۆڕا خسرۆی، چۆبووە سەر تادارەکی خوارو داپۆشیی ل پەلکە مێواو چیتی و ویشی و قەنتارێن ترێی دا هندەک ترێ زەرکۆکی بکەت و بخۆت، وەختەکی پێی ل سەر تادار لاکەتبون و کەتبوە سەر پشتا هرسەکێ، هرس هەستابو و تادار و پەرچە مێوی تێکدا پ کەریم وە بلند کردبون و ل بۆڕیای دابو و، کەریم ل ترسا گەلەک نەمابو پێخڕێ بگری، هرسش ل کەریمی ترسیا بو و شەڕی نەکردبو، یەکسەر حەلاتبو. کەریم ل سەر پەرچێ هاتبووەخوار و ترێشی نەخواردبو. کەریم  هنۆکە ت ژیان دایە و هیویدارین تەندروست و ژی درێژ بیت تگە هەموو هاوڕێ و خۆشەویستێن سەرنجدەر.

 وێنێ داندرای ل خوار گوندێ شۆشنێ یێ هاتیە کێشان.

عەزیزان گوندێ شۆشنێ نزارەکی زۆر نەخۆش بو، هەر وەختێ بەفر تباری، ڕەش نەتبوۆ هەتا بارانێن بوارێ لێتدا. سالێن دواییا ١٩٧٠ هەر سێ چار مال لێ مابون، هندەک شۆشنەیی کەتبونە گوندێ بەنێ و ببونە بەنەیی. مهاجر و فەقێ،ش چۆبونە گوندێ پەپانێ. مالا مەحمود شۆشنەیش وبەر تۆپا کورد پەروەرا کەتن و کەسیان لێ نەمان. مەلا هادی و کوڕۆکش چۆنە بەر دلۆوانیا خودایی و بچوکێت وانش یە هوردەکۆکە بون و چۆنۆ ناو مالە خالە ل ناو دۆلەمەڕیا. تکرێ هەر مالەکە گوندیێن وێ دەڤەرێ، سەدان چیڕۆکێن ڕۆمان ئاسا پبێ نویسین مابنۆ.

بیرەوەریێن گۆڕا خسرۆی چەند پشکەکن و هێستا تەواو نەبووە.