بەشی سێ:
گۆڕا خسرۆی، پشکا دواییێ.
پێشی ڕاگواستن و خراب کردنا گوندێن سەر سنورا، مالا مە یەک مالەیی بو ل سولکێ. سولکێ زەوی و دارێ بەریی زۆر بون، زۆربەشیان مالێ مە بون. سولکێ و گۆڕا خسرۆی قریقاج تکەتنە بەرامبەر یەک و ڕوباریان بەین بو. سولکێ کەتبوە بەڕۆژێ خوار گوندێ بەنێ و گۆڕا خسرۆیش کەتبوە نزارێ خوار گوندێ شۆشنێ، بن چیایێ دێلی. بوارا هە زوو بەفر ل سولکێ ڕەش تبوۆ، بەس ل نزارێ شۆشنێ و گۆڕا خسرۆی زۆر درەنگ ڕەش تبوۆ، چونکی هەتا دەمژمێر نۆ و زێدەتر ڕۆژێ لێنەتدا لبەر چیایێ دێلی. ل دەستپێکا هاوینا سالا ١٩٧٨ گوندێ مە کەتە بەر ڕاگواستنێ، گوندێ شۆشنێ نەکەتە بەر. ئەمەیان ئیناینە کۆمەلگەیا بانیقەبرانێ ل بەینا کۆیێ و هەولێرێ. پاییزا ١٩٧٩ ئەز پ سەردان چۆمۆ گوندێ شۆشنێ، شەوێ ل مالا حوسێن شۆشنەیی بوم، سبیانێ عەلی و هاوژینا خۆو قادر داچنە سماق چنینێ ل گۆڕا خسرۆی. منش تەگبیر وەبو کو پ قاچاخی بچمە ناو شونهەوار و ڕەزێن سولکێ و پاشی بێمۆ نک وان و هێوارێ پێکوە بگەڕێینۆ.
پشتی سەرکێشت خواردنەکە زوو وڕێکەتین، هەتا گۆڕا خسرۆی پێکوە چۆین، ئەوان قۆناغ ل سەر شیوا دەستێ ڕاستێی گۆڕێ دانا و ئەز چۆم بەرەو سولکێ. ل ڕوباری پەڕیمۆ و ملم دا هەروازێ هنداو چالۆکا هەتا گەشتمە سەر جۆخینا سولکێ، چاوم کەتنە کەوارێن جۆخینێ و ڕەنگەکی غەریبم هاتە پێش و هەموو کەوارێن جۆخینێ نخولیابونۆ و شەق شەق ببون. پاشی چۆمە سەر کانیا نیوەکا دەرەدیا سولکێ و دیتم کو یا پڕ سەر قەزەپ و تۆز و ستری بوی و ڕەخێن دەراوێ لیم گرتی و بێسەرو بەر ببون، مالە هنجیرا خوار کانیێ سۆتبون و نیوە هشک ببون. ئەو دیمەن هەموو تبونە گوالە هەوڕێن خەیالێن زولما لسەر گوندیاو لناو مێشکێ من تهاتن و تچۆن و لبەرخۆ تمگۆت، خودایە، خەتا و سوچێن مە گوندیا چبونە، بۆ دەبی ئەم گوندی ل گوندێن خۆ، ل ڕەسەنێ باب و باپیرێن خۆ بهێینە ودەرنان و ژیانا سەر ئاخامە لمە حەڕامبیت و پقاچاخی نەبیت نەشێین سەردانا وارو دارو کانی و جۆو زەوی و شیوو بانیێن خۆ بکەین، خودایە تبێن ئاشق چجارا پمراد ناگەن، ئەو ئەشقە چ بو مە گوندیان هەی بۆ سروشتێ وارگەهێن خۆ!
ت وان خەیالا دابوم، هەر زێدەتر و دل توندترو چاو پڕ ڕۆنکتر تبوم. مانە هەر ل بچوکایەتیدا سەرێ مە هاتبووە پڕ کردن کو گرین، پتایبەت گرینا پدەنگ بۆ پیاوا گەلەک شەرم و شورەییە. ئەز وێ دەمێ کەتبومە تحالەکی بێحالدا. چاوم گێڕان و کەسم لدەورەی خۆ نەدیت، چریوێنا بالندا بو پغەریبی تیان خیندو لدەورەی من و هنجیرێن سۆتایی و کانیا پڕ بویەوە و جۆیا خراب بویی و شوڕێن هەڕفیایی تفڕین و پحەزینی لسەر تادارێن هشک بویی تنیشتن، ئەو دیمەن بونە قورسەکی گران لسەر دل و دەرونێن من و گرینێ پەنگ دابوۆ تناو سینگێ من دا، هەستم پسۆتنەوا ناو هناوێن خۆ تکرد و دەمارێن بەدەنێ من تێکدا گەرم و پندفیابون و دل لێدانەکە لسەر ڕەنگێ تەنگەنەفەس و پشی سوارو هەلچۆیی، خودایە دەبی چ دەردەک ل ئەشقا خاک و خۆلا گوندێ مرۆ لێ لدایک بویی گرانتر و پژانتر و وێرانکەرتر بیت! ت واندەردەبیراندا، هێدی هێدی پناو دەرەدیێڕا هەلکشیام هەتا چۆمە بەر دەرکا شکەوتا فاتەشینکێ و ژۆردا ل دەرەدیێم نێڕی، دارە تووا سەرگا دەرەدیێ پەلک وەراندبون، جۆیا ناو دەرەدیێ هشک و بێ ئاو مابو، مالە هنارێن پێش خانیی سۆتی و وێران ببون، نە شوڕە شوڕا ئاوێ تهات، نە دەنگە دەنگا جۆتیارو ئاودێرا، نە یارا وارا و خەملا جارا، نە دەوس و شۆپا ڕەوەندێ هەرکیا، ئایی کە ڕوحە قاییم بوو ل قەفەزا سینگێ من دەرنەتکەت و دەرنەدچۆ، خۆم خوشاندە ناو شکەوتێ و پالم داوۆ شورەیا نیوە داڕمیایی و دەستم پگرینەکە پدەنگ کرد بۆ چەند خولەکەکا، هەتا پیچەک دەمارێن لەشم سوست بون و شیام پشیێ هەلکێشم و قودرەتا هەستانێم هەبیت. ئیدی چاوم بەراییان نەدا، چیدی پدلێ پڕو غەریب و لانە لێ حەرام و بەرگەم نەگرت وان دیمەنا ببینم و هەستام ژۆردا هاتمە خوارێ و هەتا سەر ڕوباری ڕانەوەستام. دەست و چاوێن خۆم شوشتن و ڕوم بلند کردو گۆتم خودایە، دیارە ژیان ئەو دەردو بەلایەنە و ئەمە یەنەشارەزاو بێ هاگاو بێ ئەزمون بوین و وەینتزانی، ژیان خۆشییە، شادییە، تەباییە، مانەوە و تێکهەلاوییە تگە هەوارگەیێن باب و باپیرا و ئەشقەکە پڕ مرادو مەخسەد حاسلە. خودایە قەت نەبووە و نەینزانییە کە مرۆ ل مالا خۆ بێ خەتاو خواری، حەڕام و یاساخ بی.
هەر کو بیت، هەتا پو ڕەنگی چۆم و گەڕیامۆ سەر ڕوبارو دەست و چاوم شوشتن و بێنەکە باش ڕونشتم، ئیدی ڕۆژ ل بلند بونێ تەواو ببو و شۆڕ تبوۆ و گاوی تهاوێتن بەرەو پاش دانێ نیوڕۆ. کە گەڕیامۆ بەرەو گۆڕا خسرۆی، دیتم کو هێشتا عەلی و قادر هەرە مژغولی سماق چنینێنە، هاوژینا عەلی،ش ل قۆناغێ سماق ت جوالا تکرد. هەر بۆ خاترا هندێ دا خەیالێن ناخ هژین لبیر خۆ ببەمۆ، ل سەرگا دەحلیڕا هاتمە ناو لانێن هرسا، پێم ل پەرچ و هوردە دارا نا، بووە قرچە قرچ و خشە خش، عەلی و قادر تەنگاو بون و گۆتیان ئەها پخودای هرسەکا تناو پەرچێدا. قادری گاس کرد و گۆتی کوڕە عەلی هەڕە فەنگێ بینە ئەو هرسە دێهێتە مە، عەلی،ش گاس کردە هاوژینا خۆ و گۆتیێ کیژێ ئەوێ فەنگێ بۆ من بینە هرسەکا لێرە، وەختێ هاوژینێ فەنگ گەیاندە دەستێ عەلی و چرکێنا تۆپا پەڕەشوتێ هات، ئەز پێکەنیم و گۆتم عەلی فەنگێ پ کار نەئینە من هرسا دەرکردی، عەلی و قادری هەردوکا پێکوە گۆت، ئەی مالت خرا نەبی، ئەمەت بساندین، ئەتو بۆ چۆیە تناو وێ پەرچێدا، هەکە هرسا خۆ ل تو دابا؟ ئەوجی لانا هرسایە. فەقیرا بێنەکێ ل ترسا ئیشیان ڕاگرت، پاشی ئەمە هەرسێک پێکوە چۆین و سماق چنینین تەواو کردو بارین بار کردن و بۆ شەوێ گەڕیاینۆ بۆ شۆشنێ.
