له سه‌ره‌تای سالانی ١٩٦٠ دا، چه‌ند په‌ستێك هه‌بونه له هه‌موو پارێزگای هه‌ولێر.
یه‌كێك له‌و په‌ستانه، له به‌ینی هه‌ولێر و سه‌ربه‌ن و شه‌قلاوه كاری گواستنه‌وه‌ی خه‌لك و ئه‌شیایان كردووه. جاده و ڕێگاكانی ئه‌و سه‌رده‌م زۆر ناخۆش و بێ خزمه‌ت بون. پرده‌كان گشتیان ته‌خته دار بون. به‌شێكی زۆری جاده، بیرێزراو بون به به‌رد و چه‌گل و قوم.
به‌هۆی عه‌قلی خێله‌كی و شه‌ڕ فرۆشیی بنه‌ماله‌ی بارزانی به هۆزه‌كانی ناوچه شاخاویه‌كان، به‌تایبه‌تیش دژی سۆفیه‌كانی شێخ ڕه‌شید لۆلانی، له سالی ١٩٦٢ به‌شی هه‌ره زۆری خه‌لكه هه‌ژارو دوور له هۆشیاریی ناوچه‌ی برادۆست ئاواره بون و په‌رت و بلاوی به‌ینی دیانا و هه‌ولێر بون. زۆر ته‌علیق له‌سه‌ر خه‌لكانی چاونه‌كراوه‌ی ئاواره‌ی گونده ساده و دوور له زانست و شارستانیه‌تی ناوچه‌كه‌مان هه‌بون. به‌دلنیاییه‌وه زۆربه‌ی ناوچه چیایی و دووره ده‌سته‌كان هه‌ر وابونه. ته‌علیقه‌ك لێی ئه‌وه بو، گۆتیان زیله قه‌دیمه‌كانی سه‌ربازی عێڕاق و ئه‌و سه‌رده‌م هاتن بۆ گواستنه‌وه‌ی ئاواره‌كان بۆ جێی دیاریكراو. له خه‌لیفانێ پشوویان دابو، مال و خێزان دابه‌زیبون و به‌لاوی سه‌ر ڕوباری خه‌لیفان ببون بۆ ئیسڕاحه‌ت و نان خواردن.
پاشان هنده‌ك له‌و ئاواران له سه‌ربه‌ن دامابون. ئه‌و ماله ئاواره، له ژینگه‌یه‌كی سروشتی و دوور له بۆن و هه‌له‌ماری شاران ژیابون و ڕه‌نگی ڕه‌سه‌نی خۆیان له‌ده‌ست نه‌دابو. پێشتر نه‌ك سواری مه‌كائین نه‌ببون، به‌شی هه‌ره زۆریان ئۆتۆمبێل و تراكتۆر و مه‌كینه‌و نعۆریان هه‌ر نه‌دیتبون.
ڕۆژێك ژنێكی نورانی و ساده و دوور له قسه‌ی پێچه‌وانه و چه‌ند واتا، دێته جێی دیاریكراوی په‌ست و چاوه‌ڕوان ده‌بێت هه‌تا په‌ست ده‌گات بۆ ئه‌وه‌ی به په‌سه‌ت بڕوات بۆ هه‌ولێر. په‌سته‌كانی پێشان، وه‌كی زیلی ڕوسی بون. ته‌نیشته‌كانیان ته‌خته دار بون. جاده‌كانی ئه‌و سه‌رده‌میش له زۆربه‌ی جێگا، به‌ردڕێژ كراو بون و قیڕتاو نه‌كرابون. به‌نزین و گازوایلی ئه‌و سه‌رده‌میش، بۆنێكی زۆر قورس و گرانی لێده‌هات. له‌هه‌مانده‌مدا، خه‌لكان له بۆن و بوخار و دوكه‌لی ئۆتۆمبێلان ڕانه‌هاتبون و زۆر به ده‌گمه‌ن سواری ئۆتۆمبێل ده‌بون. بۆیه هه‌ركاتی سواری ئۆتۆمبێل ده‌بون، سه‌رو دلیان تێكهه‌لده‌هاتن و ده‌ڕشانه‌وه و گێژو وێژ ده‌بون.
ژنه چاوه‌ڕوان بو، كاتێك په‌ست به‌دیار كه‌وت. دوای ڕاوه‌ستان و ئاماده بونی په‌ست بۆ بار كردنی گه‌شتیاران، ژنه خۆی ده‌گه‌ێنێته شوفێری په‌ست و به ده‌نگێكی به‌رز، پێیده‌لێ كوڕم شوفێر، ته‌سه‌رت گه‌ڕێم ته‌پشته‌وه‌م مه‌نێ، ته‌پێشه‌وه‌م بنێ، چونكی ته‌پشته‌وه‌م بنێی تێكه‌‌چم، بۆیه حه‌زه‌كه‌م ته‌پێشه‌وه‌م بنێی. ژنه‌ی داماو، مه‌به‌ستی خراپی نه‌بو، مه‌به‌ستی ته‌نها ئه‌وه‌بو كه ساێقه‌كه هه‌ول بدات، كورسیه‌كی پێشه‌وه‌ی بداتێ و نه‌چیته پشته‌وه‌ی په‌سته‌كه، چونكی له‌سه‌ر كورسیه‌كانی پشته‌وه، زیادتر سه‌رو دلی تێكهه‌لده‌هاتن و تێك ده‌چو. كه‌چی لێی بووه ته‌علیق و ده‌كرێ هه‌تا ئێستایش بۆ پێكه‌نین بگێڕدرێته‌وه.
ئیتر ژیان به‌و شێوه بو. له زۆربه‌ی كۆلانه‌كانی هه‌ولێریش، خانه‌ی چاوره و باربه‌ران هه‌بون، باشترین قازانج له سنعه‌تی كورتان درویان دابو. به ده‌گمه‌ن نه‌بایه، هه‌موو كاروان و هاتو چۆیه‌ك هه‌ر به پێڕۆ و كه‌رو باران بو. زۆربه‌ی جۆتیارانیش، جۆتیان به كه‌رو هێسترو گایان ده‌كرد. داوو ده‌رمان و كۆل و بالاوی ڕۆژانه و حه‌فتانه نه‌بو. له زۆر جێیان سابونیش په‌یدا نه‌ده‌بو، چجای شامپۆ و میكیاج و ئاوی گه‌رم و گه‌رماو.
سه‌ره‌ڕای ئه‌و نه‌بونی و بێ عه‌یشیش، مرۆڤه‌كان شاد و ساده و بێ خه‌م ده‌ژیان. نانی ئێواره‌یان خواردبا، خه‌می به‌یانییان نه‌بو. ڕوحی یارمه‌تیدان و پێكه‌وه ژیان به‌هێز بوو ڕاستگۆیی و سه‌داقه‌ت و ئه‌مانه‌ت پارێزراو بون.
No comments:
Post a Comment