ده‌ست بریندار بونم.
ته‌مه‌نم ده‌وری ١٤ سالان بو. له ڕۆژێكی سه‌ره‌تای پاییزی ١٩٧١دا، شوانی بزنان بوم. بزن زۆریان حه‌ز له چلوی دار مازین بو. ئێمه‌ی شوان، له‌هه‌ر جێگایه‌ك باین، شه‌وان ڕون و هسانمان ده‌هێنان و داسی دار بڕینمان ئه‌وتۆ ده‌هسو كه وه‌ك گیوزان سه‌ری پێ ده‌تراشرا. هه‌رده‌م دوای هسون، به به‌له‌ك و ڕانی خۆمان داده‌هێناو تاقیمان ده‌كرده‌وه داخوا مووان ده‌كات (ده‌تراشی) یان نا. ئه‌گه‌ر موی نه‌كردبان، دیسان ده‌مان هسو، هه‌تا موی نه‌كردبان، لێینه‌ده‌گه‌ڕاین.
بزنم بردبونه به‌ینی ختره و سولكێ، (ختره و سولكێ دو جێگه‌ن له خوار گوندی به‌نێی خواكوڕكی) دار مازینێكی چلو ناسكم هاته‌پێش، داسم له جه‌نته‌ی شانم ده‌رهێناو هه‌لباوزیمه سه‌ر داره‌كه. زۆربه‌ییم داپه‌رجنی و بزن ده‌وره‌یان له چلوی دابو و ده‌له‌وه‌ڕان.
یه‌ك تاداری هه‌لچوویی به سه‌ری دارمازینه‌كه‌وه مابو، جێگه‌ی زۆر ئاسێ و ناله‌بار بو. حه‌زم نه‌كرد ئه‌و لكه دار به‌سه‌ریوه بمێنێته‌وه. ئێمه‌ی گوندی، هه‌رده‌م تانه (ته‌علیق)مان له‌سه‌ر هندێ هه‌بو، كه ئه‌گه‌ر كه‌سێك دارێكی ده‌بڕی و هنده‌ك پرچك و لكی پێوه ده‌مان، هه‌ر كێیه‌ك ده‌گه‌یشته دار بڕه‌كه، ده‌یگۆتێ، ئه‌وه بۆ فلانه داره‌ت كه‌چه‌ل كردووه؟ منیش چومه سه‌ر ناوه‌ڕاستی تاداره‌كه و ده‌ستی چه‌په‌م له بنی تادار گرت بۆ ئه‌وه‌ی به‌رنه‌بمه‌وه، به‌ده‌ستی ڕاسته داسم وه‌شانده تادار، داس هه‌لزه‌قیه‌وه، ڕێك به زه‌ندی ده‌ستی چه‌پم كه‌وت، شاده‌ماری پلك (په‌نجه)ی به‌رانكێی په‌لدام و خین (خوێن) فیچكه‌ی به‌ست. له داره‌كه دابه‌زیم و به‌رده‌وام خوێن له‌به‌ر برینی ده‌ستم ده‌ڕۆیشت. هندێك دووری گوندی بوم، جێگه‌یه‌كی چۆل و هۆل بو، ئه‌و ڕۆژی هیچ شوانی تر له‌و ده‌وروبه‌ری نه‌بون. شتێكیشم له‌به‌ر ده‌ست نه‌بو بۆ پێچانی و خین وه‌ستاندنی،ناچار به‌و شێوه له‌به‌ر بزنان مامه‌وه هه‌تا هێوارێ (ئێوارێ) و خوێنێكی زۆرم له‌به‌ر برینێ ڕۆیشتبو. به‌و هۆیه‌وه هه‌تا گه‌یشتمه‌وه مالێ، ته‌واو شه‌پرزه ببوم. كه گه‌یشتمه‌وه مالێ، هنده‌ك سپرتۆیان بۆ له برینی دام، له‌گه‌ل سپرتۆ لێدان، ڕوح هه‌ولی ده‌دا ده‌ربچێت و ئه‌و ئازاره قورسه نه‌كێشیت، كه‌چی به‌ده‌سته خۆی نه‌بو و ناچار بو خۆی له ئێش و ژان ڕابهێنی. ده‌ستیان بۆ پێچام به تڕیه په‌ڕۆی ئاسایی. چه‌ند ڕۆژێكی به‌سه‌ردا تێپه‌ڕین، برینی ده‌ستم ته‌شه‌نه‌ی كرد و پیس بو، (واته ئیلتیهابی كرد) مالێ پێیانگۆتم به‌نیشتی داره به‌ن و گیای ڕاكێشۆكی له‌سه‌ر دانێ هه‌تا خاوێن ده‌بێته‌وه. منیش شه‌وێك له كاتی نوستن، به‌نیشت و ڕاكێشۆك،م له‌سه‌ر دانا، به په‌ڕۆ پێچام و نوستم. به‌یانی هه‌ستامه‌وه، كه په‌ڕۆم كرده‌وه و به‌نیشت و ڕاكێشۆك،م لابردن، برینی ته‌واو خاوێن كردبویه‌وه، به‌س، برینی ئه‌وه‌نده والا كردبو، ده‌ترسام ته‌واوی ده‌ستم سقه‌ت بكات. خه‌لكانی دلسۆزی گوندی، خه‌به‌ریان دامێ و گۆتیان، له‌شكری سه‌رمای پاییز ڕاوی كۆچه‌ریانی ناوه و بڕه مالێكی ڕه‌وه‌ندی هه‌ركی، له كیوستان (كوێستان) دابه‌زینه و له شیوی خوار گوندی زۆمه‌یان داناوه، ده‌لێن پیره ژنێكی لوقمانیان له‌گه‌له، زۆر زیره‌ك و لێزانه، بڕۆ لای پیره ژنه‌كه، له‌وانه‌یه چاره‌سه‌ریی برینی ده‌ستت بكات. هه‌ستام هه‌مان ڕۆژ چوم بۆ ناو زۆمه‌ی هه‌ركیان و به پرسیار، پیره ژنی نورانیم په‌یدا كرد. له‌گه‌ل سه‌لام و چاك و چۆنی، لێی پرسیم و گۆتی، "چ خێرته"؟ منیش برینی ده‌ستم كرده‌وه و پێشانیم دا، كه چاوی پێكه‌وت، گۆتی، "كوڕم ئه‌وه چیت له‌سه‌ر داناوه؟ خه‌ریكه ده‌ستت سقه‌ت ده‌بێت". منیش باسی به‌نیشت و گیای ڕاكێشۆك،م بۆی گێڕایه‌وه، هه‌ر خه‌ریك بو مێشكی تێك بچی له‌پێش والا بونه‌وه‌ی برینی ده‌ستم. گۆتی، "كوڕم، به‌نیشت و ڕاكێشۆك برینی داخراوو كولكی ده‌رنه‌بویی، والا ده‌كه‌نه‌وه، برینی ده‌ستی تۆ داخراو نییه، ته‌نها پێویستیت به خاوێن كردنه‌وه هه‌بووه، نه‌ك به‌نیشت و ڕاكێشۆك. من ده‌رمانت بۆ داده‌نێم و برینت زوو چاك ده‌بێته‌وه، به‌س له‌به‌ر ئه‌وه‌ی شاده‌ماری جولاندنی په‌نجه‌ی به‌رانكێت ته‌واو له‌كار كه‌وتووه و دوله‌ت بووه، په‌نجه‌ی به‌رانكێت له‌كار ناكه‌وێت، به‌س به‌رز نابێته‌وه". پیره ژن، هنده‌ك جه‌ویی تێسوی بۆ هێنام له‌ناو هاونێكی بچوك جوان كوتایی و له شێوه‌ی كل هوردی كرد. پێیگۆتم "ئه‌و ده‌رمانه‌ی له‌سه‌ر داده‌نێی بۆ سێ ڕۆژان، برینه‌كه گۆشت ده‌هێنیته‌وه و خۆی لێك ده‌داته‌وه، به‌س له سێ ڕۆژ زێدته‌ری له‌سه‌ر دابنێی، زێده گۆشتی دروست ده‌كات و ده‌بیته ماسولكه‌یه‌كی دیار و ناشیرین". پیره ژن ڕاستی كرد، به‌و ده‌رمانی دوای سێ ڕۆژان، برینی ده‌ستم سه‌رپۆش بویه‌وه، به‌س هه‌تا ئێستایش په‌نجه‌ی به‌رانكێم بلند نابێت. پیره ژن پێیگۆتم، "ئه‌گه‌ر گه‌رماو گه‌رم گه‌یشتبایه لام، وام ده‌كرد ده‌ماره بڕدراوه‌كه‌ت خۆی لێك بداته‌وه. به‌س تازه، ده‌بێ سوپاسگوزار بی كه ده‌ستت ته‌واو سقه‌ت نابێت". به‌و به‌سه‌رهاتان ڕاهاتم به‌رگه‌ی ئازاری دژوار بگرم. بۆیه پاش ئه‌و وه‌ختی، ئیتر باكم به كێشانی ددان نه‌بو به كه‌لبه‌تان و به‌بێ سڕ (به‌نج) كردن. هه‌ر كاتی ددانم ده‌ئێشا و به گولاو لێدان و سوتاندن ژانی نه‌شكابایه، ده‌چومه لای محه‌مه‌د عه‌لی. ئه‌ویش كه‌لبه‌تانێكی ژه‌نگاویی به‌ده‌سته‌وه ده‌گرت و پال ده‌كه‌وتم و ددانی بۆ ده‌رده‌هێنام، پاشان هنده‌ك خێلاوكی له برینی ددانی ده‌داو ته‌واو. ئێستاش به‌رگریم زۆر به‌هێزه، چه‌ند نه‌شته‌رگه‌یه‌كم بۆ ئه‌نجام دراون و دكتۆر ده‌رمانیان بۆ نوسیوم، به‌س یه‌كجاریش، ده‌رمانی ئازار شكێنم بۆ كه‌م كردنه‌وه‌ی ئازاری نه‌شته‌رگه‌ری به‌كار نه‌بردووه.
پیره ژن له‌بن همبنیی ڕه‌شمالێكی شه‌ش ستون (ئه‌ستوند) دانیشتبو، ده‌وروبه‌ری جێگه‌ی، به‌س توره‌گه‌ی ده‌رماناتی گیای خۆڕسكی لێده‌بیندران. پیره ژن زۆر له دكتۆرێكی پله‌به‌رزو خاوه‌ن چه‌ندین بڕوانامه لێوه‌شاوه‌تر بو. چاره‌سه‌ری زۆربه‌ی شكه‌ستن و برین و سوتان و نه‌خۆشیه باكتریاییه‌كانی پێبو. هه‌رچه‌نده له سه‌رده‌می هنۆكه‌دا هه‌موو دام و ده‌زگای بزیشكی فه‌راهه‌مه، به‌س جێگای لوقمانه كورده‌واریه‌كان هه‌ر خالییه و كه‌م پزیشك هه‌ن بتوانن جێگایان بگرنه‌وه.
ڕه‌حمه‌ت له ڕوحی پیره ژنه‌كه و هه‌موو كۆچ كردووه سودبه‌خشه‌كان.
No comments:
Post a Comment