كه‌سێك به‌ناوی (ئێم)، له جه‌ماعه‌تی ته‌عویز پێدراوی سالی ١٩٧٨، ئێواره‌یه‌ك هنده‌ك پاره له‌گه‌ل خۆی ده‌بات و ده‌چێته مه‌عڕه‌زێك، ئه‌وكاتی جێی هۆتێل فه‌ریدی سه‌ر سی مه‌تریی شاری هه‌ولێر، مه‌عڕه‌زی تڕمبێل فرۆشتن بو. ئه‌ویش له‌ناو مه‌عڕه‌ز ده‌سوڕێته‌وه و دلی ده‌كه‌وێته فیاتێك. بازاڕ ده‌كات و فیاته‌كه ده‌كڕێت. خاوه‌ن مه‌عڕه‌زیش پاره‌كانی لێوه‌رده‌گری و كلیلی تڕمبێله‌كه‌ی ده‌داتێ، كه كلیلی ده‌داتێ، پێیده‌لێ، پیرۆزت بێت و ده‌توانی بڕۆی. (ئێم) به مه‌عڕه‌زچی ده‌لێ، سوپاس به‌س، من نازانم تڕمبێل بهاژۆم، ده‌بێ شوفێرێكم له‌گه‌ل بنێری هه‌تا بۆم بگه‌ینیته‌وه مالێ له كۆمه‌لگه‌ی كه‌سنه‌زان. مه‌عڕه‌زچی ناچار كه‌سێكی له‌گه‌ل ده‌نێری و فیاته‌كه‌ی بۆ ده‌هاژوات هه‌تا ده‌یگه‌ینیته‌وه مالێ، به‌ڕێگاوه (ئێم) دیقه‌ت ده‌داته شوفێره‌كه داخوا چۆن تڕمبێل ده‌هاژواو كلاچ و ستۆپ و گێڕی چۆن به‌كار ده‌هێنی.
(ئێم) خۆی بۆی گێڕاینه‌وه و گۆتی، ” كه شوفێره‌كه ڕۆیشت، هه‌ستام چومه ناو تڕبێل، وه‌ك شوفێره‌كه كلاچم داگرت و كلیلم تێی وه‌بادا و تڕمبێل كه‌وته ئیش. هێدی هێدی كلاچم سست كرد، تڕمبێك كه‌وته ڕۆیشتن. مندال ده‌هاتنه سه‌ر جاده، نه‌مده‌زانی هۆڕنه‌ی هه‌یه، هه‌ر له په‌نجه‌ره‌ڕا بانگیانم ده‌كرد و ده‌مگۆت، كوڕه خۆتان لاده‌ن، ئیستاپم نییه! گۆتی به‌و شێوه له نمره یه‌ك له‌و كۆلانی سوڕامه‌وه و هاتمه‌وه پێش مالی خۆمان، ستۆپم لێدا و تڕمبێل هه‌م ڕاوه‌ستا، هه‌م كوژایه‌وه. گۆتی، ئه‌و شه‌وی هه‌تا به‌یانی خه‌و نه‌چووه چاوانم له خه‌نی خۆشیان. ئێم به‌ره‌به‌یان خه‌وی لێده‌كه‌وی وبۆخۆیشی فێره كێشته‌خه‌و بوو. ئه‌و ڕۆژی كێشته خه‌وی ناچاریی كردبو و زوو هه‌لنه‌ده‌ستابوو. كاتێك بانگی ده‌كه‌ن و ده‌لێن، له‌خه‌و هه‌سته حاجی (خ) هاتووه بۆ سه‌ردانمان. ئێم له‌خه‌و هه‌لده‌ستی و به‌خێرهاتنی حاجی (خ) ده‌كات، دوای چاك و چۆنی و هه‌والپرسین و چاخواردنه‌وه، حاجی (خ) به ئێم ده‌لێ، دیاره تڕمبێلت هه‌یه، هه‌سته با پیاسه‌یه‌كی هه‌ولێر بكه‌ین. ئێم ده‌كه‌وێته كراسی شه‌رم و له‌ڕووی ناهێ پێیبلێ من شوفێری نازانم، ده‌لێ زۆر باشه ده‌با بچین. هه‌ردوكیان سواری تڕمبێل ده‌بن، ئێم هه‌ر وه‌ك ڕۆژی پێشتر، كلاچ داده‌گری و تڕمبێك به‌ئیش دێخیت و له مالی خۆی هه‌تا دێته بازگه‌ی هه‌ولێر كه ده‌كاته نزیكه‌ی ١١ كیلۆمه‌تر له نمره یه‌ك ده‌یهاژوا، له بازگه له‌بیری ده‌چیت كلاچ داگری، له‌گه‌ل ستۆپ لێدان، تڕمبێل ده‌كوژێته‌وه. ئینزیباتی بازگه پێیده‌لێن فه‌رموو بڕۆ، ئێم چه‌ندی پێ له‌سه‌ر سكلێته‌ری به‌نزین داده‌گری، هه‌ر ناڕوات، لێی تێك ده‌چیت و به‌بیری ناهێته‌وه كه ده‌بێ كلاچ داگری و بیداته‌وه ئیش، به‌بێ كلاچ سلفێكی لێده‌دات، تڕمبێل جه‌مپ ده‌كات، ئینزیباته‌كان گشتیان له قوله دێنه‌ده‌رێ و پێی پێده‌كه‌نن. ئێم زێده‌تر سه‌ر شێوایی ده‌بێت و جاری دووه‌م سلفی لێده‌دات، ده‌ست پێده‌كات هه‌ر له‌دو یه‌ك سلفی لێده‌دات، هه‌رجاری سلفی لێده‌دات، تڕمبێل بازده‌دات و نزیكه‌ی مه‌ترێك ده‌ڕوات هه‌تا له ئینزیباتان دوور ده‌كه‌وێته‌وه، ئه‌وكاتی هۆشی دێنه‌وه و ده‌زانێ كه ده‌بێ كلاچ داگری. له‌گه‌ل كلاچ داگرتن، تڕمبێل به‌ئیش ده‌كه‌وێت و له نمره یه‌ك ده‌كه‌ونه ڕێگا. به‌ڕێگاوه، حاجی (خ) ده‌لێ به‌ڕێز ئێم، من ته‌مه‌نێكی زۆرم هه‌یه، سواری زۆر جۆره تڕمبێلان بویمه، به‌س ئه‌وه یه‌كه‌م جارمه تڕمبێل ببینم له شێوه‌ی ئه‌سپ به جۆتكه بڕوات!. ئێم زه‌رده خه‌نه‌یه‌ك ده‌كات، به‌س هۆش و بیری هه‌ر له‌لای تڕمبێله‌كه‌یه‌تی و ده‌ڕوات هه‌تا ده‌گاته جاده‌ی شێخه‌للا. ئه‌و زه‌مانی، جاده‌ی شێخه‌للا چون و هاتن بو، به‌س بۆ ڕاوه‌ستان ته‌نها دیوی چونی ڕێگا پێدراو بو. ئێم هه‌ر چۆن به‌ره‌و قه‌لات هاتبوو، به‌و شێوه له جاده‌ی شێخه‌للا ڕاوه‌ستابوو، مرورێك چوبووه پێشی و پێیگۆتبوو، كاكه ئه‌م دیوه قه‌ده‌غه‌یه، بسوڕێره‌وه، له‌و دیوی ڕایگره. ئێم له‌سه‌رخۆ به مروری گۆتبوو، مروربه‌گ، به‌خوا نازانم بیسوڕێنمه‌وه، ئه‌و پیاوه‌تیه‌م له‌گه‌ل بكه، ها ئه‌وه كلیل، تڕمبێله‌كه‌م بۆ بسوڕێنه‌وه. مرور پێیگۆتبوو ئه‌دی چۆن ده‌یهاژۆیت؟ ئێم پێیگۆتبوو، مروربه‌گ، ئه‌تو بۆم بسوڕێنه‌وه و ڕوی لێبده كه‌سنه‌زان، خه‌می هاژوانێت نه‌بێت! هاهاهاها.
وێنه‌كه‌م له گوگل ده‌ست كه‌وتووه.
No comments:
Post a Comment