میرێ ئامێدیێ

میرێ ئامێدیێ:

ڕێزدار محەمەد هروری بۆی گێڕامۆ و گۆتی ” توغیانا حوکمێ میرێ ئامێدیێ بو، عاقلدارو بڕوادارێ میری، عیسێ دەلا بو، میر بۆ هەر دەرەکێ چۆبا، عیسێ پێڕا بو. هەردەم دیوانا میری تەژی مێوانێن بیانی و خۆیی بون. ت دیوانێدا غەلبە غەلب و گالە گالا ڕونشتیان بو. تناوگفتوگۆیاندا میر هاتە دەنگ و پرسیاری کردو گۆتی.

کی تزانی پیسترین تشتێن ژیانێ چنە؟

دیوان بێدەنگ بو، هەر کەسەک ت هزرا وەلامەکێ دابو.
عیسێ هاتە وەلام و گۆتی: میرم پیسترین تشت تەماحە، مرۆ بۆ تەماحێ تکەونە گەلەک کردارێن نەباش و خراب.

میڕ: ئەز باوەڕ ناکەم تەماح پیسترین تشت بیت، کەس نییە بۆ تەماحێ کارێن خراب ئەنجام بدەت.

عیسێ بێدەنگ بو، لێ ئەو وەلاما نەدروستا میری ما ت دلدا. دەم هاتن و دەم چۆن، چەند سالەک پ سەر وان گفتوگۆیاندا بورین و ئەو پرس لبیرا میرو مێوانان نەمابو.

شەوەکێ ت دیوانێدا میری گۆتە عیسێ، سبەی خۆ ئامادە بکە ئەز و تو دێ گەڕیانەکێ پ ناو ئاقارێ ئامێدیێدا کەین و هندەک خۆ دووری قەلەبالغیێ کەین. عیسێی سبیانێ کارێ خۆ کردو ترگارەکی زیویی نەخش و ڕەنگ تایبەتی هەبو، ترگاری هاوێتە ت پاخەلا خۆدا و چۆ بۆ کۆچکا میری. میر و عیسێ پێکوە دەرکەتن و پ ناو کانی و چیاو سولاوێن سروشتێ ئامێدیێدا گەڕیان. ل گەڕیانێدا وەستیان و ل سەر کانیەکە زەلال و دەربویا بن بستی و کەوران ڕونشتن. میر تێنی بو، ل سەر دەراوا کانیێ گۆتی، خۆزی ترگارەک هەبا دا تێر ئاوا زەلال پێ بخۆینۆ. عیسێی دەست هاوێتە پاخەلا خۆ و ترگارێ زیویی دەرئینا و گۆتیێ ”کەرەم کە میرێ من“. میری ترگار وەرگرت و تێر ئاوی پێ خواردۆ، پاشی چاوی کەتنە نەخش و نیگارێن ترگاری و تەماحێ هزرو بیر لێ داگرتن و گۆتی ”عیسێ ئەو ترگارەت لکێرێ پەیدا کردیە، تشتەکی گەلەک نایابە، هەر لایێقی میرێن مینا منە.

عیسێی گۆت: میرێ من تو میری و قودرەت و شیانێن تو گەلەک زێدەنە، تو تشێی هزاران ترگارێن زێڕو زیوی پ ڕادان بدەیی و پ باشترین نەخش و تایبەت بۆ تو دێهێنە دروست کردن. تەماحیا خۆ نەبە ترگارێ کەسەکی وەک منی دەست کورت و بەردەستێ میری.

میر ڕازی نەبوو گۆت: ترگارێن هندە جوان نەکەتینە بەر چاوێن من، لازمە تو قایل بی و ترگارێ خۆ بدەیە من.

عیسێ: ئەز ترگارێ خۆ بێ مەرج نادەمە تو.

میری گۆت، مەرجێن تو چنە؟

عیسێ: من یەک مەرج هەیە، پیچەکە گوی بخۆ، ترگار نەزری تو بیت.

میر: شەرمە ئەو چ مەرجە، بۆخۆ مالێ دونیایێ بخوازە، هەر تشتەکی تو بخوازی، حازرە، بەس ناوێ گو خواردنێ نەئینە.

عیسێ: میرم کەس من و تو نابینی، تو شارەزای منی، ئەز چجارا تو ناشکێنم و کێماسیێن تو بۆ کەس ئاشکرا ناکەم، ها ئەوە پرتیەکە گووێ هشکە، دەستدێ و پیچۆکەکێ پاوێ دەوێ خۆ، ترگار پیرۆزی تو بیت.

میر هەستا پێوە دەستی دا پرتیەکە گووێ هشک و بۆ دەوێ خۆی برد، عیسێی تەپەک لدەستێ میری داو نەهێلا گوی پاوێتە دەوێ خۆ و گۆتیێ، ها میرم، هنۆکە بۆ من بسەلمینە کا تەماح پیسترین تشتە یان نە؟ میر بێدەنگ بو و پاشی گۆتی عیسێ وەلاما تو دروست بو. ببورە ئەزی خەلەت بوم و هنۆکە من زانی کو تەماح ل هەر تشتەکیدی پیسترە.

وێنەم ل گوگل وەرگرت.