سوپاس نامه بۆ هاوڕێ ئازیز و سۆزداره‌كانم
سلاوو حورمه‌ت و خۆشه‌ویستیمان بۆ سه‌رجه‌م ئه‌و خوشك و برا سۆزدارانه‌مان، كه به لایك و كۆمێنت و پڕایڤێت به‌شداریی هه‌والی نه‌شته‌رگه‌ریم بون، ئێوه گه‌وره‌ترین سه‌روه‌تی ڕوحی و ده‌روونین بۆ ئێمه‌ی دووره لانه، ئێوه پشت و په‌ناو هانده‌رمانن بۆ درێژه‌دانی ژیان و كۆلنه‌دان، ئێوه ئه‌وه‌نده گه‌وره‌ن، له قودره‌تی هیچ كه‌سێك دانییه به نوسین وه‌سفتان بكات، هه‌ر وشه‌یه‌كتان ڕێژنه بارانێكی بهارییه بۆ باخچه‌ی گولی هونه‌ری و سۆزداری و هاوڕێیه‌تی، ئێوه هیچ سنورێك ناناسن و له‌و دووره لانه‌ییه هێزمان پێده‌به‌خشن و واده‌كه‌ن هیچ ڕێگایه‌كی دڕكاویی ژیان نه‌بێته ئاسته‌نگ له‌پێشمان.
زۆر داوای لێبوردن له هه‌مووتان ده‌كه‌ین كه نه‌مانتوانی وه‌لامی وشه زێڕینه‌كان و پڕ له هه‌ست و سۆزداریی هاوڕێیه‌تیتان بده‌ینه‌وه، لایكه‌كانتان و وشه‌كانتان گشتیان جێگایان له‌ناو ته‌رازووی ناخماندا كراوه‌ته‌وه و فه‌رامۆش ناكرێن. ئه‌وه‌ی ڕاستی بێت، له‌و نه‌شته‌رگه‌ریه‌ی بۆیان ئه‌نجام داوم، شتێكی كه‌م نییه، چاندنه‌وه‌ی ڕه‌شكی چاوی ڕاسته‌م بۆ كراوه، كه به ئینگلیزی پێیده‌گۆترێ
Kornea Transplants
ئه‌مڕۆ ڕۆژی نۆیه‌م بو دوای نه‌شته‌رگه‌ری و سه‌ردانی دكتۆرم كرده‌وه، له دوای ته‌ماشا كردنی، زۆر ڕای له نه‌شته‌رگه‌ریه‌كه بو، دو قه‌تره‌ی ڕۆژانه‌م هه‌بون، دانه‌یه‌كی لێ ته‌رك كردم و دانه‌یه‌كیشی بۆ زیاد كردم، ده‌بێ قه‌تره‌كان به‌كار بهێنم هه‌تا چل ڕۆژیتر، دوای چل ڕۆژان، ده‌بێ بچمه‌وه لای دكتۆر بۆ ئه‌وه‌ی ئه‌و كێلانه‌ی لێیدراون، هه‌لیانگری ، ئینجا چاوم ته‌واو ساف ده‌بێته‌وه.
ئه‌و چاوه‌م له ٢٠١٣ وه نیوه نابینا بو، زۆربه‌ی خوێندنه‌وه و نوسینم هه‌ر به چاوی چه‌په بو، سه‌ردانی چه‌ندان دكتۆرم كردوه، زۆربه‌یان چاره‌سه‌ریان پێنه‌بو، زۆرێك له دكتۆره‌كان پێیان وابو، كه ئه‌گه‌ر ڕۆناكایی چاویشم بۆ بگێڕنه‌وه، مێشكم چاوه‌كه به‌كار ناهێنێته‌وه، به‌لام خۆشبه‌ختانه، له‌و ٩ ڕۆژه‌ی ڕابردودا، چاوه‌كه‌م به‌كار دێت و ته‌واو ژیانی بینینمی گۆڕیوه به‌ره‌و باشتر. دوعاخوازین كه‌س توشی نابینایی نه‌بێت و سه‌رجه‌متان ته‌ندروست بژین.
به‌ڕێزان و خۆشه‌ویستانم، ئێوه كه‌ستان لێم دوور نین، هه‌مووتان تێكهه‌لاوی ڕوحمن و لایك و كۆمێنت و هه‌والپرسین و هه‌سته‌وه‌ری و به‌هره‌داریتان له باوه‌ش ده‌گرین و ده‌یانخه‌ینه سه‌ر په‌ڕه‌ی دلمان، سۆزداری و پاكیشتان سه‌رباری هه‌موویانه، شانازیتان پێوه ده‌كه‌ین.
No comments:
Post a Comment