كۆچی دوایی مه‌لا كه‌مال مه‌لا عه‌لی ئه‌لموشی:
ئه‌مڕۆ زۆر دلگران بوم به هه‌والی كۆچی دوایی ڕێزدار مه‌لا كه‌مال مه‌لا عه‌لی ئه‌لموشی.
مه‌لا كه‌مال له ته‌مه‌نی گه‌نجایه‌تیدا ڕه‌فیقی باوكم بو، هه‌رده‌م سه‌ردانی یه‌كتریان ده‌كرد هه‌تا سالی ١٩٧٠ كه ئێمه له ئاواره‌یی گه‌ڕاینه‌وه و گونده‌كانمان ئاوه‌دان كردنه‌وه.
له پاش ئاوه‌دان كردنه‌وه‌ی گونده‌كانمان، ٩٠% خه‌لكی برادۆست خۆیان له حیزبایه‌تی و پێشمه‌رگایه‌تی ده‌پاراست و تێكهه‌لاویان نه‌ده‌بون، هۆی تێكهه‌ل نه‌بونیش دوژمنداریی بنه‌ماله‌ی بارزانی بو له‌گه‌ل شێخ ڕه‌شید لۆلانی و سۆفیه‌كانی. ئه‌وانه‌ی ده‌بونه كادیر و پێشمه‌رگه‌ی پارتیش، سۆفیه‌كان و زۆربه‌ی خه‌لكی ناوچه‌ی برادۆست، به‌چاوێكی زۆر ناشیرین و شێوه خیانه‌تكارێك لێیان ده‌ڕوانین. ڕه‌حمه‌تی مه‌لا كه‌مالیش یه‌كه‌م كه‌س بو له گوندی ئه‌لموشێ ببێته كادیری پارتی و چه‌كی پێشمه‌رگایه‌تی له‌شان بكات، هه‌ر به‌و هۆیه‌وه، مه‌لا كه‌مال ڕێزو خۆشه‌ویستیی پێشانی له‌ناو گوندیان و خه‌لكانی ئه‌و ده‌ڤه‌ردا وه‌ك پێشتر نه‌مابو. به‌س سه‌ره‌ڕای ئه‌وه‌ی چوبووه باوه‌شی حیزب و كاری نهێنی و ئاشكرای بۆ ده‌كردن، ئه‌وو باوكم ڕفاقه‌تیان به‌رده‌وام بو و هه‌ركه ڕێیان ده‌كه‌وته گونده‌كانی یه‌كتری، به‌خۆشحالییه‌وه سه‌ردانی یه‌كتریان ده‌كرد و باسی بیره‌وه‌ریه ڕابردووه‌كانیان بۆ یه‌كتر ده‌گێڕانه‌وه.
له به‌هاری ١٩٧٥دا كه مه‌لا مسته‌فا بارزانی گۆتی كاری (مه‌ن ته‌مامشود) و ئاشبه‌تالی ڕاگه‌یاند، ڕه‌حمه‌تی مه‌لا كه‌مال مه‌لا عه‌لی له مالباتی دابڕاو ئاواره‌ی ئێران بو. هه‌ر له هاوینی هه‌مان سالدا، باوكم به نه‌خۆشی كۆچی دوایی كرد و یه‌كتریان نه‌بینییه‌وه. به‌نده هه‌رده‌م ڕفاقه‌تیی مه‌لا كه‌مال و مسته‌فای باوكمم له‌یاد بووه و پڕ به‌دل حه‌زم ده‌كرد جارێك له‌گه‌لی دانیشم و بیره‌وه‌ریه‌كانی خۆی و باوكمم بۆ بگێڕیته‌وه، به‌س ئێمه له سالی ١٩٩١ ئاواره بوین و ئه‌وان له كوردستان مانه‌وه، به‌و هۆیه‌وه هه‌ر نه‌متوانی بیبینم و ئه‌و پرسیارانه‌ی له دلم دابون و حه‌زم لێبو ئاراسته‌ی بكه‌م و وه‌لامه‌كانی لێ وه‌رگرمه‌وه، له ناخمدا به‌بێ وه‌لام مانه‌وه و یه‌كترمان نه‌بینییه‌وه.
جێگات به‌هه‌شت بێت و ڕوحت ئارام بێت كاكه مه‌لا كه‌مال مه‌لا عه‌لی. خه‌وێكی شیرین و خۆشت هه‌بێت، ئێمه‌یش هه‌موومان له ڕێگای ئه‌و خه‌وه درێژه‌ین و هه‌ر یه‌كه‌مان به ڕۆژی خۆی.
دوعاخوازین خودا ئارامی به ئه‌ندامانی خێزانی و سۆزدارانی ببه‌خشی و ته‌مه‌نی درێژی بۆ منداله‌كانی جێهێشتبێت.
No comments:
Post a Comment