خنكانی ئیبراهیم مام ئاغا كانیه‌ڕه‌شی سال ١٩٦٣
خوێنه‌رانی خۆشه‌ویست، ئه‌م گێڕانه‌وه، یه‌كێكه له‌و به‌سه‌رهاتانه‌ی ئاواره‌ییمان له ده‌ستی عه‌قلی خێله‌كیی كوردایه‌تی. ئه‌وه‌ی بۆم كرابێت و له ته‌مه‌نی مندالیمدا به‌بیرم هاتبێته‌وه، نوسیتمه‌وه و به‌ته‌مای كۆكردنه‌وه‌یانم له نامیلكه‌یه‌كدا. جار به‌جاره‌ش، كورته‌یه‌كتان ده‌خه‌مه به‌رچاو. ئومێده‌وارم سه‌رنجتان له‌سه‌ری هه‌بێت. به سوپاسه‌وه.
شتێك کە هەتا ئێستاش وەك فلیمێك هەر لە یادمە، ڕۆژێك بابم و ئیبراهیم مام ئاغا کەوتنە ڕێ بەرەو دوکانەکانی کەلەکی یاسین ئاغا. منیش مندال بووم، بەگەلیان کەوتم، هەتا دەوری پاش نیوەڕۆ، ئەوکاتی گەڕاینەوە بەرە و مال. کە گەیشتینەوە ناو مالان، ئیبراهیم بە باوکمی گۆت،” مستەفا بابچینە سەر زێی، تۆزێك مەلەوانی بکەین و فێنك ببینەوە.” بابیشم گۆتی،” وەرە با بچینەوە مالێ من هیلاکم، تاقەتی مەلەوانیم نییە.” بەلام ئیبراهیم سور بوو لەسەر چوونی مەلەوانی. بابم بەرەو مالەوە ڕۆیشت. منیش گۆتم،” بابە، من لەگەل ئیبراهیم دەڕۆم بۆ مەلەوانی.” ئەویش ڕێگای پێدام و ڕۆیشتین بۆ سەر زێ. کە چوین پێنج هەتا شەش کەسیتر مەلەوانیان دەکرد. من نەمدەوێرا بچمە ناو قولایی ئاوەکە، ئیبراهیمیش مەلەوانی نەدەزانی. هەر لە لێوار خۆی دەخستە ناو ئاو. نازانم کێ بوو، بەلام کەسێك هەر دەیگۆتێ،” ئیبراهیم، وەرە وەرە ئێرە قول نییە.” ئەویش وردە وردە بەرەو قولایی ڕۆیشت.
هەر ئەوەندەم بینی ئیبراهیم نقوم بوو. سەری بدیار کەوت و هاواری کرد. بەلام دیار بوو، ئاوەکە پێچ بوو. هەر لێکی سوڕاند و کەس نەیتوانی یارمەتی بدات. کاتێك لەناکاو عەبدولرەحمانی برای لەناو مالانڕا هات و هەر بە بەرگەوە خۆی هاویشتە ناو ئاوەکە و گەیشتە ئیبراهیمی برای، ئیبراهیم لەتاو گیاندان و فەوتان دەستی لە برایەکەی گیر کرد و هەردووکیان نقوم بوون. جارێکیتر سەریان بەدیار کەوتەوە و نقوم بوونەوە بۆ چەند چرکەیەك. بەلام دواجار بوو ئیبراهیم ببینینەوە. دیارە کە بەرەو خنکان ڕۆیشت، دەستی لە عەبدولرەحمانی برای بەربوون و برایەکەی بەبێ ئومێدی لە ڕزگارکردنی ئیبراهیم گەڕایەوە و خۆی گەیاندە قەراخ ئاوەکە و دەستی نایە کێلەکان و ڕووی لە شەپۆلەکانی ئاوەکە کرد و بە گریانەوە و لە بێ تاقەتی لەسەر چۆکان دانیشت. خەلکانی زۆمەکە هەر هەموویان خڕۆشانە سەر لێواری ئاو و سەرلێشێوا بوون و نەیاندەزانی چی بکەن. دایکی ئیبراهیم لەتاو کوڕەکەی ئەوتۆ بە سۆز و کۆل هاواری دەکرد و دەگریا و دولکی پێی هەلدەگۆتن. ئەوانەی ئەو دیمەنەیان دەدیت، ناچار دەبوون دەست بە گریان بکەن. 
ئەو ئێوارە و شەویش هەتا ڕۆژی پاشتر دایکی ئیبراهیم بە مندالەکانیەوە لەگەل خەلکێکی زۆری جیرانەکانی بەبێ ڕاوەستان و نوستن و پشودان لەو دەو ئاو و چۆم دەهاتن و دەچوون بەو ئومێدەی لاشەی ئیبراهیم لە جێگایەك دەرکەوێت و بیدۆزنەوە و بە خاکی بسپێرن، بەلام هەولەکان بێ ئەنجام بوون. ڕۆژی دواتر سێ مەلەوانی لێهاتوو و پشوودرێژیان لە موسل بە کرێ گرتن و هینایانن بۆ دۆزینەوەی لاشەکەی. مەلەوانەکان ئەو گۆم و دەراوەیان تێکڕا بە وردی پشکنین. لەبیرمە یەکێك لە مەلەوانەکان چووە ژێر ئاو و نزیکەی چەند خولەکەك لە ژێر ئاو مایەوە و زۆر کەس وایان دەزانی کە ” چوومە قولایی ئاو لەوێ کونە شاخێکم بینی و چومە ناو ئەو کونە. بەلام کە چوومە ژوور لەو کونە، دیار بووئەویش خنکاو ناگەڕێتەوە، بەلام لەدوای ئەو کاتە مەلەوانەکە بە پەشوکاوی هاتەدەر و گۆتی،
ئەشکەوتێکی زۆر گەورە بوو. زۆربەیم پشکنی، بەلام سەرەڕای بێ ئەنجامیم لە سۆراخی لاشەی ئیبرایم، خۆیشم لەناو ئەشکەوتەکە ون بووم و نەمدەزانی ئەو کونەی پێیدا چووبوومە ژوورەوە لەکامە لایە. بەهەر حال خەریك بوو، بێ ئومێد بم لە خۆڕزگارکردن و دۆزینەوەی ئەو ڕێگایەی پێیدا چووبوومە ژوورەوە. بەلام خوا یارمەتی دام. دواجار توانیم دەرگای دەربازبوونم بدۆزمەوە و بێمە دەرەوە.
تکا لە هەمووتان دەکەم خۆتان بپارێزن لەو جێگایە و با کەسیتر بەو هۆیەوە گیان لەدەست نەدات.” لەپاش ئەو هەولانەش، کەسوکاری ئیبرایم، بەتایبەت دایکی، زیادتر لە مانگێك بوو، هەر لەو جێگایەی کە ئیبراهیم لێی خنکا بوو، هەتا لای گوندی زەنگول و سفه‌یێ شەو و ڕۆژ لە لێوار و چۆمەکانی زێی کەلەك دەهاتن و دەچوون بۆ دۆزینەوەی لاشەکەی، یان هەر نەبی سۆراخێكی لێ په‌یدا بکەن کە دلئارامیان پێ ببەخشێ، بەلام ئەو مەڕاقە بێ ئەجام مایەوە لە دلی دایکی و کەسوکارەکەیدا.
ڕوحی ئیبراهیم و سه‌رجه‌م كۆچكردوان شاد.
No comments:
Post a Comment