ڕۆژی پاشتر زۆربه‌ی خەلکی دیانا و برادۆستی بەتایبەت، هەموویان خەریکی کۆ کردنەوەی لاشە و پارچە و ئێسقانی ئەو ١٣١ ژن و مندالانە بون کە بە تۆپباران گیانیان لێ ستاندرابوەوە بۆ ئەوەی ژێرگیان بکەن. بەشێکیش بە بریندارانه‌وە مژغول بون. لەشکری کوردایەتیی لەو پیلانە نەکەوتن و شەوی دواتر دیسان دەستیان کرد بە هاونبارانکردنی زۆربەی دیانا و تەکیەی حاجی محەمەد لۆلانی.
له‌بیرمه هاونێك به‌سیله‌ی ئه‌و ژووره كه‌وت كه‌ئێمه‌ی مندالی تێدا بوین. ژوره‌كه پڕ تۆز و بۆن باروت بوو. ئێمه‌ی مندال تێكڕا قیژاندمان و خۆمان به‌سه‌ر یه‌كتر دادا. لەپەنای تۆپباران كردنیشدا، شەوێ هێرشیان هێنا بۆ سەر دیانا و گەیشتنە ناو کۆلانەکانی مالە فەلان. بەس کە دەنگی تفەنگان نزیك کەوتەوە، ئیتر سۆفی بانگی یەکتریان کرد و دەیان گۆت،” کوڕینە هەستنە سەرەخۆ و بەرپەرچیان بدەنەوە، ئەگینا ئەوا گەیشتنە سەر مال و خێزان و ناموسمان، هەستن کاتی غیرەت و دەستهەلینانە. هەستن بە سەربلنی بمرین باشترە لەوەی ناموسمان بکەوێتە دەستی دڕوندەکان.” لەوێدا سۆفیەکان تێكڕا گیان فیدایانه دەستیان دایە تفەنگان و کەوتنە هێرشبردنی پێچه‌وانه بۆ سەر هێرشکەرانی چه‌ته‌كانی كوردایه‌تیی. شەڕێکی دەستە و یەخە بەرپا بوو. خەلکێکی زۆر لە هەردوو لایان کوشتی و بریندار بوون. بەس چونکی سۆفیەکان شەڕی مان و نەمانیان دەکرد، باکیان پێنەبوو چەندیتر دەکوژرێن. فیدایانە بەرپەرچیان دانەوە. هەر لەناو مالە فەلانی دیانا جەنازەیان لێ بەجێ مابون و شکەستن و پشتیاندا. لە سەنگەری شینکەکانی بادلیا و بن سەروکیانیی دیاناش لەشکری سۆفیان دەستیان بە هێرش کرد دژی لەشکری کودایەتیی ژن و مندالکوژ. ئەو شەوی هەتا سبیانێ شەڕ زۆر گەرم و گوڕ بوو. سبیانێ دیسان سۆفی لە هێرش بردنەوە نەکەوتن و هێزی دەستوەشێن لە مال و خێزانی بێتاوان، ناچار بون بالای چیایەکان ببن و هەلبێن. حکومەتیش لەبەر ئەوەی سۆفیەکان هەولی پێکهاتنەوەیان دابوو لەگەل بنەمالەی بارزانی و دەیانەویست چەکداری بۆ حکومەت نەگەن و بگەڕێنەوە بۆ سەر گوندەکانیان، بۆیە سەرەڕای ئەو هەموو کارەساتەی بەسەر سۆفیان هات، هێزی حکومەت خۆیان کردبووە ماری مردی و نەجولان و بەهانەی لێقەوماوانەوە نەهاتن. بەس کە ڕۆژی دووەم بۆ سێیەم حکومەت بینیی سۆفیەکان گیانفیدایانە دەستیان بە هێرش کردووە دژی لەشکری کوردایەتیی، ئیدی ئەوانیش هێزیان جولاند و هندەک تۆپ و سەربازیان ناردن بۆ پشتگیریی لەشکری سۆفیان. هه‌ر ئەو ڕۆژی سۆفی توانییان لەشکری کوردایەتیی تێکبشکێنن و دەستیان بەسەر ئەو کەتیبە تۆپانەشدا گرتبوو کە تۆپبارانی خەلکی سڤیلی دەشتی دیانایان پێ کردبون. لەو بەرپەرچ دانەوەیشدا، دەیان کوشتی و بریندار لە هەردوو لایاندا هەبون. ئەو دەست وەشاندنەی لەشکری بارزانی، بووە هۆی هەلوەشانەوەی گفتوگۆی ئاشتی و بێ متمانەیی هۆزی برادۆست و سۆفییەکانی تەکیەی لۆلانی بە مالی بارزانی. ئیدی لەشکری سۆفیان خۆیان قەیم کرد و سەنگەریان گرتن. لەناو مال و خێزانیشدا شین و واوەیلا و ماتەمینی بوو. سەرەڕای قڕکاریش، خەلکان زۆربەیان مال سوتایی و بێ نان و خواردن بون. خەلکانی خێرخواز بەناودا دەگەڕان و خواردن و پێداویستیان بۆ دەهێنان. بریندارەکان دەگوازرانەوە بۆ خەستەخانەکانی هەولێر.
بێسەرو بەریەک بوو کەس نەیدەزانی چ شێوە حەشرێکە. ئەوانەی لە یەکتر دابڕابون، لەگەل پێک گەیشتنەوە و یەکتر بینینەوە بە گریانەوە باوەشیان بە یەکتردا دەگرتەوە. بڕیاربەدەستانی برادۆستان هانایان بۆ حکومەت برد بۆ ئەوەی چارەسەریەک بۆ ئەو مال و خێزانە ناخ بریندار و دلشکاوە بدۆزنەوە کە نەهێلن جارێکی تر بکەونەوە بەر قڕکاری لولەی تۆپەکانی کوردایەتیی. حکومەت بڕیاریدا کە تەواوی مال و خێزانی برادۆستان بگوازرێنەوە بۆ کەلەکی یاسین ئاغا هەتا جێگا و ڕێگایان بۆ دابین دەکرێ.
هەرکەس بیەوێ بە تەواوی لەم نوسینانە و ئەو مێژووە ڕەشە تێبگات، هەولبدەن بەشە نوسینەکانی پێشتر بخوێننەوە.
چونکی ئەوە بەشی دوازدەهەمە.
وێنەم لە گوگل وەرگرتووە و پەیوەندیی بە کارەساتەکەوە نییە.
چاوەڕوانی بەشیتر بن.
No comments:
Post a Comment