به‌هار سالی ١٩٦٣ کە تەمەنم پێنج بۆ شەش سالان دەچوو، شوانی بەرخ و کاران بوم. ڕۆژێک لە خوار ماوەرانێ، له‌دوای به‌رخان ده‌به‌زیم، به‌رخه‌ك كه‌وته پێشم و گاوم به‌سه‌ر پشتی به‌رخه‌كه‌دا هاویشت بۆ ئه‌وه‌ی پێی لێنه‌نێم، لە بستیە شاخێک بەربومەوە لولاقی پێی چەپم شکا و لە یەک ئالا. شوان کارەکانی تر هاتن بە هانامەوە بەس ئەوەندە ئازاری زۆر بوو هەر هاوارم کرد و گۆتم دەستم لێ مەدەن. ئەوانیش ناچار بون یەکێکیان ناردەوە بۆ مالێ و هەوالی لنگ شکانی منیان پێڕا گەیاندن. باپیرم زۆری خۆش دەویستم. هەردەم لە دایک و بابیش زیادتر دلی پێمەوە بوو و لەهەر ڕوداوێکدا، ئەو پێمڕا دەگەیشت و لەباوەشی دەگرتم.
لەگەل هەوال پێگەیشتن، باپیرم حەمەد هات و لەدوورەوە کردیە هەلا و گۆتی،” کوڕە هەستە خۆ برینداری گوللە نیی." بەلام کە چاوی بە لاقم کەوت و بینیی لە یەک ئالابوو، دەستی بە قسەی خۆش و دلدانەوەم کرد و گۆتی هیچ نییە دوو ڕۆژی تر چاک دەبێتەوە و لەبیری دەکەی. ماچێکی ناوچاوانی کردم و منی دایە پشتی خۆی و گەیاندمیەوە مالێ. هەر بەو ئێوارە، مستەفا مستەفا عومەری ئامۆزای ڕەسول برایم،یان نارد بۆ لای کەسێکی بەیتار. ئەو کەسە هات یادی بەخێر و خۆشی بێت، ناوی شەریف مەرەزا بوو. لە هۆز و ڕەوەندی هەرکییان بون. کە گەیشت و شکانی لاقمی بینی. داوای کرد لەگەنێکی ئاوی شیرتێنیان هێنایە بەردەستی. بەو ئاو و سابون لاقی منی شوشت و هێدی هێدی دەیمالیمالی. داوای لە مالێ کرد کە هندەک هارد (ئارد)ی نۆک لەگەل زەردێنەی هێلکە بشێلن و بیکەنە هەویر. هەر ئەوتۆ داوای کرد هندەک شەپکە داری تەنک و بستێک زیادتری بۆ دروست بکەن. خۆیشی هەر خەریکی قسەی خۆش و خافلاندنم بوو. لەگەل لاق مالین و نوکتە و پێکەنین، لە هیکەوە شکاکەی خستەوە جێی خۆی.کە هێسکەکان خرانەوە جێی خۆی و لێکدران، بورامەوە و ئاگام لە خۆ نەما. کاتێک بە خەبەر هاتمەوە بەیانی بوو. لاقم لە شەپکەدار و هەویری نۆک و هێلکە گیرابوو. به‌یتار پێیگۆتین كه نابێ شه‌پكه‌دار بكرێنه‌وه هه‌تا ده‌زاندرێ ته‌واو هێسكه‌كان خۆیان له یه‌كتر داوه‌ته‌وه و خۆیان گرتیته‌وه. بۆ چه‌ند ڕۆژێك له‌سه‌ر جێگا كه‌وتم. له‌به‌ر ئه‌وه‌ی مندالێكی پڕ جوله و نه‌ڕاوه‌ستایی بوم، ئه‌و ڕۆژانه‌ی توانای هه‌ستانم نه‌بوو، ئەوەندە درێژ بون هەر ته‌واو نه‌ده‌بون. دوای حه‌فته‌یه‌ك هه‌ولمدا به گۆچان (دارشه‌ق) بێمه پێش ده‌رگا و بگه‌ڕێمه‌وه. دوای دوو حه‌فته توانیم لاق بده‌مه به‌رخۆم و به گۆپال هێدی هێدی بچمه‌وه ناو كار و به‌رخان. له‌هه‌مووی ناخۆشتر ئه‌و كاتانه بوو كه شكایه‌كه یه‌كتری ده‌گرته‌وه و خوریانێكی بێتام به‌رده‌بووه ده‌وره‌ی برین. له‌به‌ر شه‌پكه دارانیش ده‌ستم نه‌ده‌گه‌یشتێ و نه‌مده‌توانی بیخورێنم. چه‌ند ڕۆژێك به گۆپال ڕێم ده‌كرد و دەچومە بەر کار و بەرخان. ڕۆژێك لە شوانکاری له‌گه‌ل سه‌لیمی كوڕی ڕه‌سول برایم به‌شه‌ڕ هاتین. سه‌لیم هنده‌ك له‌من به ته‌مه‌نتر و به خۆوه‌تر بوو. من گۆپالم لێی ڕاست كرده‌وه. ئه‌ویش په‌لاماری دام و گۆپاله‌كه‌ی لێ شكاندم. به‌س چه‌ندە خۆش بوو بە شه‌ڕ هاتنی كاتی مندالیمان! هه‌ر ئه‌و ده‌م بوو پاشی چه‌ند خوله‌كێك له‌بیرمان ده‌چوو و پێكه‌وه ده‌ستمان به یاری و ده‌ست له‌ملانێ ده‌كرده‌وه. ئه‌و ڕۆژی به‌هۆی گۆپال شكانه‌وه، ناچار بوم به‌بێ گۆپال ڕێبكه‌م. ئیتر له‌و ڕۆژیه‌وه پێویستیم به گۆچان نه‌بویه‌وه بۆ پێڕۆیشتن و ته‌واو لاقم خۆی گرته‌وه. یادی بەیتار شەریف مەرەزا بەخێر زۆر باشی گرتەوە. بەس هەتا چەند سالێکیش دوای گرتنەوەی، زستانان لە سەرمای زۆر جێی شکان ژانی تێدەوەستا و دەستی بە ئازار دەکردەوە.
وێنەم لە گوگل و گوگل ئێرث وەرگرتونە.
No comments:
Post a Comment